BAGUIO CITY – Nainget nga ipatpatungpal ti city government ti ordinansa seknan iti panagaramat ti life vest partikular iti Burnham Lake.
Iti panakiuman ti Bombo Radyo kenni Daryll Kim Longid, dadaulo ti Public Order and Safety Division – Baguio City kinunana nga adda dagiti turista a saan nga agar-aramat ti life vest bayat ti panagbangka dagitoy iti nasao a pagpasyaran.
Gapu iti dayta, nagpalagip ti opisyal kadagiti boat concessionaire a masapol nga isuda ti mangipalagip kadagiti customerda a rumbeng nga agaramatda ti life vest para metlaeng iti seguridad ken pagsayaatan dagitoy.
Sigun kenni Longid, P1,500 ti multa para iti first offense; P3,000 iti second offense ken iti third offense ket posible a maipaikkat ti permit dagiti aglabsing a boat concessionaire.
Malaksid pay iti dayta, posible a maikkat ti panangidiayada ti serbisyo kadagiti turista.
Iti sabali a bangir, up-upayen ti nasao nga opisina dagiti indibidwal a mangidiadidya ti hena ken masahe iti Burnham Park gapu ta saan a nakapasa dagitoy iti sanitation ken environmental code isu’t gapuna a kasapulan a maipasardeng daytoy.
Insingasing ni Longid nga agbirok laengen dagiti masahista ken aghenhena ti umno a lugar a mabalin a pangipaayanda ti serbisyoda.
Kabayatanna, dinakamat ni Longid nga adda dagiti enforcer nga agronronda iti nasao a pagpasyaran manipod alas syete ti agsapa agingga alas nuebe ti rabii tapno masigurado ti kinatalged dagiti agturong iti nasao a pagpasyaran.//Bombo Rob Dominguez
