BAGUIO CITY–Palpalagipan ti City Health Services Office ti publiko seknan iti panagridam dagitoy kontra iti dengue ken food poisoning.
Sigun kenni city health services officer Dra. Rowena Galpo, nainget a bambantayanda dagiti dua a nadakamatna a sakit a posible a mapasaran iti panawen ti kalgaw ken panagtutudo.
Kinunana a nasken ti panangdalus iti aglawlaw ken panangliklik iti pannakaurnong ti narugit a danum a mabalin a pagbalayan ken pag-itlogan dagiti lamok.
Inayonna a nasken metlaeng a matutukan dagiti taraon a nalaka a madadael nangruna nu napudot ti panawen gaputta nalaka a mabukkel ti bakteria a posible a mangitunda iti food poisoning.
Impettengna a nasken a mapreventaran dagiti nasao a sakit tapnu saan a mainayon a pagparparikutan dagiti tattao kabayatan ti mapaspasaran a COVID-19.
