BAGUIO CITY – Nagsurat manen ni Baguio Mayor Benjamin Magalong kenni Tourism Secretary Berna Romulo-Puyat tapnu kiddawenna ti agtultuloy a panakaipalubos ti panagawat ti siudad kadagiti turista nga agtaud kadagiti nagduduma a lugar malaksid iti Metro Manila, Rizal, Cavite, Bulacan ken Laguna.
Iti interview ti Bombo Radyo Baguio, kinuna ni City Administrator Bonifacio Dela Peña a kasaruno daytoy ti pammilin ni Puyat a naawat ti lokal a gobyerno ti siudad a mangipalpalagip iti saan a panag-awat ti LGU kadagiti turista bayat nga adda ti maysa nga LGU a naipasidong iti enhanced community quarantine.
Dinakamatna nga adda ti resolusyon ti IATF a nangipalubos iti panagawat ti Baguio kadagiti turista la ketdi, saan dagitoy a nagtaud iti NCR Plus.
Kinunana a nagtaripnongda kadagiti tourism officers ti siudad ken sadiay a napagnumuanda a masurot latta ditoy siudad ti panagawat kadagiti turista malaksid kadagiti nagtaud iti NCR Plus.
Imbinglayna nga idi kalman ket impalubosda a makastrek ditoy siudad dagiti turista a nakasangpeten iti lokalidad ngem dagusda nga impakada iti Department of Tourism babaen iti maysa a surat.
ni City Administrator Bonifacio Dela Peña
