BAGUIO CITY – Mangnamnama ti mayor ti Atok, Benguet nga iti panakaipasidong ti probinsia iti General Community Quarantine (GCQ) agingga inton tapos ket ad-adda a bumuntog wenno maksayan dagiti mailislista a kaso sadiay ti COVID-19.
Iti panakiuman ti Bombo Radyo Baguio, kinuna ni Mayor Raymundo Sarac nga iti agdama ket agtultuloy a manaynayonan ti kasoda iti COVID-19 ken adda payen ti mailislistada nga insidente ti ipupusay nga addaan pakainaigan iti nasao a sakit.
Kinunana a mapunpunnon ti Atok District Hospital gaputa agak-akomodar daytoy kadagiti pasyente ti COVID-19 nga agtataud iti dadduma a munisipyo ti Benguet.
Dinakamatna a nagkiddawda met iti DPWH para iti panakaipasdek ti bukod a municipal isolation facility ti Atok ngem agingga ita ket awan ti aksion iti daytoy.
Nupay kasta, kinuna ni Mayor Sarac nga ita ket adda ti ipaspsadekda a pasilidad nga agserbi a temporary isolation facility ti munisipyo a pakaiturongan to dagiti pasyente ti COVID-19 no awanen ti espasyo iti Atok District Hospital ken kadagiti pasilidad iti La Trinidad, Benguet.
