BAGUIO CITY – Impannakkel ti Baguio City Police Office ti panagbaba dagiti kaso ditoy City of Pines iti uneg ti 11 a bulan ken ti panagsayaat ti crime solution efficiency ken crime clearance efficiency ti pulisya.
Sigun kenni PSSupt. Ramil Saculles, city director ti Baguio City PNP, manipud Enero agingga Nobyembre ti agdama a tawen ket bimmaba iti 47 percent dagiti index crimes ken non-index crimes a nailista dagitoy.
Kinunana nga ita a tawen ket nasurok iti 3,200 a kaso ti nailista ti Baguio City PNP nga adayo a nababbaba no idilig iti 6,000 a kaso idi napalabas a tawen.
Innayonna nga agtaltalinaed a pagtakaw ti kaaduan kadagiti nailistada a kaso a dimmanon iti nasurok sangaribo.
Impannakkel pay ni Saculles ti panagsayaat ti crime clearance efficiency ditoy siudad gaputa ngimmato daytoy iti 84 percent manipud iti 34 percent bayat a ti crime solution efficiency ket ngimmato met iti 34 percent manipud iti 23 percent idi 2016.
Impasiguradona met ti agtultuloy a panangipatungpal dagiti pulis kadagiti programa ken aktibidad iti siudad para iti naan-anay a panakaparmek ti kiminalidad.
