BAGUIO CITY- Al-allukoyen ni City Councilor Betty Lourdes F. Tabanda dagiti umili iti siudad ti Baguio nga agpabakuna pakairamanan dagiti annakda iti anti-flu vaccine, covid-19 vaccine ken dadduma pay.
Kagiddan daytoy ti maipatpatungpal a Bakuna Champion kadagiti nagduduma a barangay iti siudad.
Iti interview ti Bombo Radyo kenni Councilor Tabanda, kinuna a nangrugin a naipatungpal ti Bakuna Champion nu sadino adda dagiti health workers nga agserserbi kas bakuna champion nga agturturong kadagiti nagduduma a barangay tapno allukoyenda dagiti umili nga agpabakuna.
Panggep ti nasao a programa a maammoan dagiti nagpabakunan, dagiti saan pay a nagpabakuna ken dagiti masapul a mabakunaan tapno maliklikan ti aniaman a sakit.
Dinakamat ni Tabanda nga adda ti agarup P60 million a pundo a panggatang ti siudad kadagiti nagduduma nga agas nga aramaten dagiti masakit nga umili babaen iti pannakitinnulong ti Department of Health.
Sigun kenkuana, mabalin nga agparehistro iti e-consulta a programa ti Philippine Health Insurance Corporation (PhilHealth) tapno mailibre kadagiti health centers kasta met ti agas.
Malaksid iti dayta, impeksana nga adda ti libre nga anti-flu kadagiti senior citizens.
