BAGUIO CITY – Manamnama a marugyan metten ti pannakaiwaras ti maikadua a booster dose ti Covid19 vaccine kadagiti immunocompromised nga indibidual sadiay La Trinidad, Benguet.
Sigun ken Municipal Health Officer Dr. Antonette Agpas, maipangruna a maipaayan ti maikadwa a dose ti booster shot dagiti immunocompromised kas maibasar iti pagalagadan ti Department of Health a pakairamanan dagiti indibidual nga addaan iti sakit nga HIV, immunodeficiency, dagiti cancer patients ken bedridden patients.
Kagiddan iti dayta, inlawlawagna a mabalin a maipaay ti 2nd booster dose iti maysa nga indibidual kalpasan ti tallo a bulan manipod nabakunaan iti 1st booster.
Gapu iti dayta, guyguyuguyenna dagiti immunocompromised nga indibidual iti nasao a minisipyo nga agpalistada laeng iti Municipal Health Office wennu kadagiti midwives ken nurses iti barangayda para iti house to house vaccination iti 2nd booster dose.
Kinunana a nasken laeng nga ipakitada dagiti requirements kas iti vaccination card, valid ID, ken medical certificate.
Innayunna nga agtultuloy met ti panangipatungpalda iti pannagawis kadagiti residente sadiay para iti panagpabakuna dagitoy kasaruno ti pangta iti kanayunan ken baro a sub variants ti COVID-19
