BAGUIO CITY – Imbilin ni Baguio City Mayor Benjamin Magalong ti panagbakwit dagiti maseknan nga umili nga agnanaed iti asideg wenno abay ti Irisan Dumpsite.
Iti panakiyuman ti Bombo Radyo kenni Irisan Punong Barangay Arthur Carlos, kinunana nga imbilin ti mayor ti panagbagkwit dagiti umili nga agnanaed iti asideg ti dumpsite gaputa napeggad ti panagtalinaedda sadiay nangruna ita panawen ti tudo.
Kinunana a nasken nga adalenda a nalaing dagiti residential areas ken dagiti pagbakwitanda a lugar tapnu makaliklikda iti peggad ken posible a panagregga-ay iti dumpsite.
Imbingayna nga uray dagiti junkshop nga adda iti aglikmot ken wangawangan ti dumpsite ket naibilin ti panagbakwit dagitoy ken naipaayanda iti makabulan a pawayway para iti daytoy.
Dinakamatna a kinuna ni Mayor Magalong a saan metlaeng a napintas ti buya dagitoy.
Maipalagip nga imbilin ti mayor ti panakaituloy ti panagbalin ti Irisan Dumpsite kas maysa nga eco-park.
Kabayatanna, dinakamat ni Kapitan Carlos nga imbilin metlaeng ni Mayor Magalong ti panang-ingetda iti panagbantayda kadagiti bulos nga aso tapnu saan dagitoy nga agkatangkatang kadagiti kalkalsada ti entero a barangay.
Umap-apela met daytoy kadagiti umili ti Irisan iti panagtungpalda kadagiti bilin ti baro a mayor. (-Bombo Nikki Agsiweng)
