BAGUIO CITY – Indeklara ti Commandant of Cadets ti Philippine Military Academy (PMA) nga hazing-free itan ti akademya.
Kagiddan daytoy iti maysa a tawen ti umuna nga anibersaryo ti ipupusay daydi Cadet 4th Class Darwin Dormitorio.
Maipalagip a pimmusay ni Dormitorio, parbangon ti September 18 idi napalabas a tawen gapu iti nakaro a panakaparparigatna iti ima dagiti upperclassmen daytoy.
Sigun kenni Brigadier General Romeo Brawner Jr., adda ti nagsayaatan ti ipupusay ti nasao a kadete gaputa nangitunda daytoy iti ado a reporma iti sistema ti akademya a nagresulta met iti epektibo ken komprehensibo a sistema ti panagdisiplina kadagiti kadete.
Kinunana a nagbaliw itan ti panangipataw iti dusa kadagiti kadete a mangipatungpal iti hazing wenno panagmaltrato no sadino dagosda a masuspendir ken mapapanaw iti PMA wenno severe punishment a dumalan iti corrective measure.
Sigun pay kenni Brawner, napasayaat itan ti sistema ti Honor Code dagiti kadete bayat a nagsisina metten ti barracks ti tungal klase dagiti kadete.
Nupay agtultuloy ti panangusig ti korte iti kaso ti brutal a panagmaltrato kenni Dormitorio, kinuna ni Brawner nga adda ti napintas nga intunda ti ipupusay ti kadete. (report ni Bombo Charles Nikko Limon)
(timek ni Brigadier General Romeo Brawner Jr.)
