BAGUIO CITY – Impeksa manen ti baro nga undisputed ONE Flyweight World Champion Geje ‘The Gravity’ Eustaquio nga awan ti panggepda a manglaban iti ibilbilangna a pamilya iti lubong ti mix martial arts.
Nagbalin a sungbat daytoy ti Igorot fighter kalpasan a rimsua ti pakaseknan iti posibilidad a panagsangoda iti kaduana iti Team Lakay a ni Danny Kingad a makitkita ita a kapigsaan a flyweight title contender.
Iti panakiyuman ti Bombo Radyo, kinuna ti kampeon a no daytoy ti masurot ket saanna a kayat a makalaban ni Kingad.
Kinunana nga ubing pay ken addan to ti panawen nga agbalin to a kampeon ni Kingad kas makita iti ugali ken performance daytoy.
Saanna met nga inlibak a napartak ti panag-develop ni Kingad iti mix martial arts gaputa manipud idi naabak idi kenni Adriano Moraes ket nagtultuloy ti winning streak daytoy.
Nupay kasta, inaklon ti baro a kampeon a no dagitoy to ti mabali a best of the best ket posible a saan a maikkat ti posibilidad a dagitoy ti agsango para iti iggemna a titulo.
Immuna metten nga impasigurado ni Kingad nga awan ti parikut no daytoy ti agserbi a gatekeeper ni Eustaquio.
