BAGUIO CITY – Italtal-o ti City Tourism Office ti panagbalin ti siudad ti Baguio kas maysa nga sports destination.
Iti panakiyuman ti Bombo Radyo kenni Rhey Delmendo, empleyado ti nasao nga opisina, gapu iti daytoy ket italtal-oda ti panagbisekleta kas medium of transportation iti siudad.
Kinunana a maysa nga addang iti daytoy ti maisaksakad a panaka-aramid ti bike lanes ditoy Baguio a nakapasan iti umuna a panagbasa iti City Council.
Inyunay-unayna a nasken a maaddaan iti bike lane iti siudad gaputa daytoy ti kiddaw dagiti kaaduan nga agar-aramat iti bisikleta nga apan agtrabaho wenno agadal.
Innayonna a ti panagaramat iti bisikleta ket eco-friendly gaputa makainot iti gasoline, maka-ehersisyo ken maital-o pay ti turismo.
Paset ti adbokasiya ti lokal a gobyerno ti Baguio ti panakarambak ti 1st World Bicycle Day ditoy siudad idi kalman a pinasetan dagiti adu a bicycling enthusiasts.
Karaman dagiti nagbalin nga aktibidad iti nasao a selebrasyon ket ti 30-km fun bike ride ken bicycle clinic sadiay Malcolm Square a nakaitampokan dagiti nagduduma nga aktibidad kas iti maintenance tutorials, marshal training ken dadduma pay.
