BAGUIO CITY – Mamati ni Philippine Drug Enforcement Agency (PDEA) Director General, Undersecretary Wilkins Villanueva a ti Cordillera Region ti kaunaan a rehiyon iti entero a pagilian nga agbalin a drug-cleared iti kabiitan a panawen.
Inwaragawagna daytoy iti panagbitlana sadiay Camp Major Bado Dangwa, La Trindiad, Benguet kabayatan ti panagsarungkarna ditoy Cordillera.
Kinunana a gapu daytoy iti agtultuloy a panakaisayangkat ti illegal drug eradication operations iti nagduduma a lugar ditoy rehiyon.
Sigun kenkuana, agresulta dagiti operasyon iti in-inot a panagbalin a drug-cleared ti Cordillera kabayatan ti panagtulod dagiti tawen.
Dinakamatna met a saan unay a parikot ditoy Cordillera ti shabu gaputa kadawyan a makumkumpiskar ket dagiti marijunana.
Kaggidan iti daytoy, pinadawayan ni Usec. Villanueva da Police Regional Office Cordillera Director PBGen. R’win Pagkalinawan ken PDEA-Cordillera Regional Director Gil Castro gapu kadagiti nagsasaruno nga illegal drug eradication operations nga insayangkat dagitoy ditoy rehiyon itay laeng nabiit a nagresulta iti panakadadael ti minilmilyon a pisos a gatad dagiti marijuana.
Kabayatanna, inyunay-unayna met ti pagkasapulan para iti panakitinnulong dagiti lokal a gobierno iti kampanya ti gobyerno kontra iti iligal a drog tapnu marisut ti parikut iti iligal a droga ditoy rehion Cordillera.
