--Ads--
BAGUIO CITY – Agtultuloy a maisaksakad ti panggep a panagbalin ti munisipio ti La Trinidad, Benguet kas maysa a siudad.
Inlawlawag ni Mayor Romeo Salda a babaen iti daytoy ket karkaro pay a mapapintas ti La Trinidad.
Kinunana a no agbalin a siudad ti La Trinidad ket ad-adu dagiti opurtunidad a maipaay para iti panagdur-as ti panagbiag dagiti umili.
Mainaig iti daytoy ket inpila ti ACT-CIS Representative ken Benguet Caretaker Congressman Erik Go Yap ti House Bill 6367 para iti panggep a panagbalin ti La Trinidad kas siudad.
Kinuna ti kongresista a babaen iti daytoy ket maipaayan ti La Trinidad iti dakdakkel a pondo.
Innayon ni Yap a no agbalin a siudad ti La Trinidad ket maaddaan daytoy iti bukod a pakabigbigan.
