BAGUIO CITY – Nagbalinen a vision ti maysa kadagiti 8th placers iti 2017 Bar Examination ti agbalin nga abogado.
Iti panakiyuman ti Bombo Radyo kenni Atty. Algie Kwillon Mariacos, kinunana nga ubing paylaeng daytoy ket naissemen daytoy a maki-debate ken agsao ken ad-adda a napatibker ti tarigagayna nga agbalin nga abogado gapu kadagiti nabuybuyana nga abogado a main-interview kadagiti telebisyon.
Kinunana a babaen iti panagbalinna nga abogado ket ad-adda a maasa wenno mapasayaat ti abilidadna iti panakaidebate ken iti komunikasyon.
Kinunana a nagbalin pay a nalawag ti vision daytoy nga agbalin nga abogado bayat ti panagadalna iti nangatngato a tukad.
Sigun iti 25-anyos manipud Sinacbat, Bakun, Benguet, saan met a nagbalin a nalaka ti panagadalna iti abogasya iti San Beda University – Manila gaputa saan met dagitoy a nabaknang unay ken adayo pay daytoy iti pamilyana.
Imbingayna a naka-adal daytoy iti abogasya gapu iti kontribusyon dagiti kabagyanna ken iti tulong dagiti am-ammon dagiti nagannakna.
Dinakamatna a nagbalin a karit iti panagadalna ti kaawan ti presensia sadiay dagiti kapamilyana a mabalin a pangipeksaanna iti marikrikana tunggal mabagsak daytoy iti aniaman nga eksaminasyonda.
Mangnamnama pay ni Atty. Mariacos a makatulong to daytoy kadagiti agkasapulan nangruna ta tarigagayna ti agsubli iti nagtaudanna nga ili tapnu agipaay met iti serbisyo.
Iti agdama ket agtatrabaho daytoy iti maysa a pribado a law firm sadiay Manila ken agtalinaed pay sadiay iti sumagmamano a tawen tapnu ituloyna ti agadal.
Impeksana met ti nalaus a panagyamanna kadagiti amin a timmulong iti panagadalna nangruna dagiti nangipaay iti tulong pinansiyal, kararag, inspirasyon ken suporta.
Ni Atty. Mariacos ket nagleppas iti kurso a Bachelor of Arts in Political Science sadiay Saint Louis University sakbay a nagala iti abogasya.
Nakagun-od daytoy iti 88.9 percent iti 2017 Bar Exams ken nakaduana iti 8th place ni Atty. Krizza Fe Bagni nga agdama a budget officer ti Bagabag, Nueva Vizcaya.
