BAGUIO CITY – Nangrugin ti panagbantay dagiti personnel ti Public Order and Safety Division (POSD) ti Baguio kadagiti jeepney terminals iti siudad kabayatan ti rush hours tapnu tumulongda iti panakaipasigurado ti panakasurot ti 70% capacity kadagiti jeep ken ti physical distancing ken panagsuot ti face masks dagiti pasahero.
Iti interview ti Bombo Radyo Baguio, imbinglay ni POSD chief Marvin Herrera nga addan dagiti sumagmamano a drivers dagiti parapasahero a jeep a binagbagaan ken sinitarda mainaig iti implementasyon dagiti nasao a paglintegan iti uneg ti lugan dagitoy.
Inaklonna nga awan iti mandato ti POSD a mangmulta kadagiti matiliwanda nga aglabsing kadagiti naituding a paglintegan ngem itedda iti pulisya ken LTFRB wenno LTO ti report-da kadagiti nasao a panaglabsing.
Dinakamatna nga adu a drivers ti sinitarda iti paradaan dagiti jeep iti deppaar ti Calderon Street gapu iti panaglabsing dagitoy iti health protocols.
Inaklonna met a marigatanda a mangbantay no dagiti drivers dagiti jeep ket agilugan ti kanayonan a pasahero kabayatan ti panagbiahe dagitoy.
Imbinglay pay ni Herrera a naobserbaranda ti panaglabsing iti 70% capacity kadagiti parapasahero a jeep nga agtataud iti ruar ti Baguio kas kadagiti jeep nga agtataud sadiay Itogon, Benguet.
Inlawlawagna met a maawatanda a kurang dagiti yunit nga agbibiahe kadagiti nasao a lugar isut gapuna a saan a maliklikan ti panangilugan dagitoy iti sobra no iti naituding a limitasyon.
Nupay kasta, inyapela ni Herrera ti panangsitar a mismo dagiti pasahero kadagiti drivers dagiti parapasahero a jeep nga aglabsing iti 70% capacity.
Dinakamatna a no agunget dagiti masitar a drivers ket alaen ti pasahero ti plaka ken ruta ti jeep sakbayda nga ireport iti opisina ti POSD, iti Baguio Police ken iti LTFRB wenno LTO.
