BAGUIO CITY- Nainget ti panagwanawan ita dagiti personnel ti Tourist Police Unit (TPU) ti Baguio City Police Office (BCPO) kadagiti nagduduma a parke iti siudad ti Baguio.
Iti interview ti Bombo Radyo Baguio kenni PMaj. Dencio Dayao, dadaulo ti nasao nga yunit ti pulisya, kinunana a daytoy ket gapu iti panagadun dagiti turista nga agpaspasyar kadagiti kangrunaan a parke ti siudad kas iti Burnham Park ken iti Mines View.
Dinakamatna a manipud idi Biyernes ti napalabas a lawas ket naobserbaranda ti panagadun dagiti tattao, partikular dagiti turista nga agturturong kadagiti pagpasyaran iti siudad.
Kinunana a pattapattaenna a dumanon iti dua a ribo dagiti turista nga adda ita ditoy lokalidad.
Iti baet daytoy, kinunana a nainget met ti panagwanawanda ken ti panangpalpalagipda kadagiti park-goers mainaig iti panagtungpal dagitoy kadagiti pagalagadan kontra iti COVID-19 kas iti panagsuot ti facemask ken faceshield ken ti social distancing.
Innayonna nga adda metlaeng ti built-in speakers iti Burnham Park a maar-aramat iti panakaiwaragawag dagiti palagip kadagiti health protocols ken iti nagduduma nga ordinansa ken pagalagadan ti siudad.
Namnamaenda pay nga umado dagiti agturong kadagiti parke ken pagpasyaran iti siudad ngem impasiguradona ti panagbantay dagiti pulis para iti kinatalged dagiti turista.
Immunan a kinuna ni City Tourism Officer Alec Mapalo a mangrugi ita a bulan ket ad-adda a manayonan pay ti bilang dagiti turista a makastrek ditoy siudad kas maibasar iti listaan ti Baguio VISITA website.
Kinunana nga uray pay iti bulan ti Disyembre ket adun dagiti nagaplikar a turista para iti panagbisitada ditoy siudad ti Baguio.
