BAGUIO CITY – Pormalen a mangrugi ita nga aldaw ti maika-23 nga edisyon ti panakarambak ti Baguio Flower Festival wenno Panagbenga nga addaan iti tema a “Celebration of Culture and Creativity”.
Marugian daytoy babaen iti maangay a Grand Opening Parade nga idauluan ti lokal a gobyerno ti siudad ti Baguio.
Umuna iti parada ti banner ti Panagbenga babaen iti Girl Scouts of the Philippines, sarunuen daytoy ti PANAGBENGA 2018 nga iggeman ti Hapiyoh Mi Cultural Group ken ti Color Guard babaen iti Philippine Military Academy ken ti PMA Band.
Sumaruno iti linya ti parada dagiti opisyales ken department heads iti lokal a gobyerno ti Baguio ken sumaruno kadakuada dagiti opisina ti gobyerno sakbay dagiti community-led events kas iti Little Miss Panagbenga, Panagbenga Mask Painting, ti Baguio Flower Festival Foundation Inc. ken dadduma pay.
Sakbay met ti 11 nga entries para iti Drum and Lyre – Street Dance Competition iti Elementary Division ket umuna pay nga agmartsa ti Saint Louis University Marching Band.
Sumaruno dagiti opisyales ken Board of Directors ti Liga ng mga Barangay ken kalpasanna ket maimatangan ti Street Dance Competition dagiti 20 a miembro ti Liga ng mga Barangay iti siudad.
Kalpasan dagitoy ket sumaruno nga agparada dagiti makipaset iti Walk for Animal Welfare ken dadduma pay.
Agserbi pay ti nasao parada para iti panakapili dagiti walo a contingent nga ag-perform para iti Grand Street Dancing Competition inton Pebrero 24.
Kalpasan ti parada ket maangay ti programa iti Baguio Athletic Bowl para iti pormal a panagrugi ti Panagbenga 2018.
