BAGUIO CITY – Panggep ti mayor ti Baguio a maiyakar ti lokasyon ti nalatak a Baguio Blooms Exposition and Exhibition sadiay Lake Drive a maysa kadagiti kangrunaan a tampok iti tinawen a Panagbenga ditoy siudad.
Sigun kenni Mayor Magalong, daytoy ket gaputa panggepda a ma-commercialize ti nasao a kalsada.
Kinunana a maaramat ti Lake Drive para kadagiti nalatak nga aktibidad ti Panagbenga inton sumaruno a tawen 2020 ken kadagiti sumaruno pay a tallo a tawen.
Mainaig iti daytoy, kinuna ni Baguio Flower Festival Foundation, Incorporated media officer Andrew Pinero a supsuportaranda ti nasao a panggep.
Dinakamatna a maiyakar koma ti Baguio Blooms Exposition and Exhibition a naangay idi Pebrero ita a tawen 2019 sadiay Baguio Convention Center ngem gapu iti panakaipatungpal ti rehabilitasyon sadiay ket saan a natuloy ti plano.
Nupay kasta, mangnamnamada nga iti kabiitan a panawen ket malpasen ti rehabilitasyon ti nasao a pasilidad.
Kabayatanna, impanamnama pay ni Mayor Magalong a saanen a makibiyang dagiti barangay ti siudad iti panakaisayangkat ti nalatak a Session Road in Bloom bayat a ti BFFFI ti mangisayangkat iti nasao nga aktibidad.
Maipalagip a nagbalin a nabara nga issue ti Panagbenga ita a tawen gapu iti pakaseknan iti nakaangayan ti Baguio Blooms Exhibition and Exposition ken partisipasyon dagiti barangay iti Session Road in Bloom. (-with Bombo Charles Nikko Limon)
