BAGUIO CITY – Kidkiddawen dagiti vendors iti Baguio Blooms Exhibition & Exposition ti panangsuportar dagiti umili kadagiti lakoda a produkto.
Sigun iti maysa nga aglaklako a nakapatang ti Bombo Radyo News Team, manipud nangrugi ti operasion dagiti puesto iti Baguio Convention Center ket manmano laeng dagiti apan gumatgatang kadagiti lakoda.
Mamati ti nasao a vendor nga adu dagiti rason iti panagbaba dagiti malaklakuanda ita no idilig kadagiti napalabas a tawen a naipatungpal ti Baguio Blooms sadiay Burnham Park.
Kinuna a daytoy ket posible a gapu iti pannakaiyakar ti Baguio Blooms iti sabali a lugar, ti kina-adayo ti lokasion daytoy ken posible a gapu iti epekto ti pangta ti coronavirus disease wenno COVID 2019.
Iti baet daytoy, agtaltalinaed a positibo ti nasao a vendor ken mangnamnama daytoy a maka-subbotda kadagiti masungad nga al-aldaw nangruna ta nailaylayon ti operasion ti Baguio Blooms kagiddan ti pannakaiyakar ti schedule dagiti highlights ti Panagbenga 2020.
Aw-awisen ti nasao a vendor dagiti umili nga agturong kadagiti puestoda ken kitaenda no adda ti kayatda a gatangen ken impanamnama a nababa laeng ti presio dagiti lakoda.
