BAGUIO CITY – Maituloy ti panakarambak ti Baguio Flower Festival wenno Panagbenga inton February 2021.
Inwaragawag daytoy ni Mayor Benjamin Magalong kagiddan ti panangipettengna a kabaelan ti lokal a gobierno nga imanehar ti kaso ti COVID-19 ditoy siudad.
Kinunana nga imparangen ti board of trustees ti Baguio Flower Festival Foundation, Inc. (BFFFI) ti konsepto ti maangay a festival.
Dinakamatna a manamnama a maipatungpal ti landscaping exhibition and competition ken ti Session Road in Bloom.
Nupay kasta, malimitaran laeng dagiti aglako iti Session Road in Bloom tapnu masurot ti physical distancing.
Innayonna a saan a maipatungpal ti Grand Street ken Float Parade a kangrunaan a tampok ti Panagbenga tapno maliklikan ti mass gathering wenno panaka-urnong dagiti tattao.
Sigun pay kenni Mayor Magalong, naksayan dagiti aktibidad a maisayangkat iti Panagbenga 2021.
Impettengna a kasapulan laeng ti kooperasyon dagiti umili ken dagiti kabangibang a lokal a gobyerno iti panakakontrol ti kaso ti COVID-19. (report ni Bombo Janice Denis – edited by GCB)