BAGUIO CITY – Opisialen a nairekep ti selebrasion ti Panagbenga Festival iti Baguio City babaen iti firework display a naipatungpal sadiay session road.
Nangrugi ti nasao a festibidad idi Marso 6 babaen iti inter-faith prayer iti Panagbenga Park sadiay South Drive ken ti special cultural performance ti University of the Cordillera Saeng Kasay.
Nailukat metlaeng ti Baguio Botanical Garden ken Panagbenga Opening Exhibition “Gardenscapes”.
Naipatungpal ti Handog ng Panagbenga sa Pamilya Baguio, FUNagbenga ZUmba, Let a Thousand Flowers Bloom Open Painting Exhibition, Panagbenga Kite-Flying Challenge and Cultural Show idi Marso 13.
Naipabuya ti maikadua a Montañosa Film Festival sadiay Baguio Athletic Bowl idi Marso 19 agingga 27; Panagbenga Open Dance Competition idi Marso 20, Session Road in Bloom idi Marso 21 agingga inton Marso 27 ken Flower Tee Golf sadiay Baguio Convention Center idi Marso 25 agingga Marso 26.
Saan met a naipatungpal ita a tawen dagiti crowd-drawing activities kas ti street dancing parade.
Kabayatanna, naituding a mailukat ita nga aldaw dagiti sumagmamano a kalsada nga immunan a naiparekep iti trapiko para iti selebrasion ti Panagbenga.
Karaman ditoy ti Session Road kas ti SM Rotunda, Governor PAck Road, Assumption Road, Fr. Carlo Loop, Calderon St., Perfecto St. ken Mabini St.
Manamnama met a marambakan manen ti Panagbenga Festival inton Pebrero 2023 ngem saan a limitado dagiti aktidad partikular dagiti dadakkel a parada kas ti street dancing parade.
Mainaig iti dayta, tinagiragsak ti Hotel and Restaurant Associations in Baguio (HRAB) ti balligi a pannakarambak ti pestibidad ita nga tawen.
Iti interview ti Bombo Radyo Baguio ken Andrew Pinero, pannakangiwat ti HRAB, kinunana nga adu dagiti turista ken residente ditoy syudad ti nakipaset iti maudi nga aldaw iti Session Road in Bloom a paset ti nasao a pestibidad idi kalman
Kinunana nga adu dagiti produkto a mailaklako iti session road a naipaayan ti diskwento, rason iti panagturung dagiti adu a tao sadiay
Innayunna nga adu pay dagiti nang uray ken nagbuya iti fireworks display
Inaklonna met a saan a naliklikan ti saan a pannakasurot ti social distancing ngem naipasigurado iti umno a panagaramat dagiti umili ti facemasks dagitoy
Kabayatanna, imbinsana a dinmanon iti 100% ti occupancy rate dagiti sumagmamano kadagiti hotels ken restaurants
Kinunana a mapatta patta a dumanon iti 60 agingga 70 a pursyento ti occupancy rate iti weekdays
Gapu iti dayta, pinagyamananda iti nagbalin a desisyon iti lokal a gobierno iti pannakapalukay dagiti restriksyon kagiddan iti agtultuloy ken panagtalinaed a nababa ti kaso ti COVID19 ditoy syudad
