Manarimaan ti panagberipikar dagiti maseknan nga otoridad iti Benguet State University seknan iti isyu kadagiti stall owners a maatap nga agop-operate uray awanan dagitoy iti business permit sadiay BSU strawberry farm.
Sigun kenni Josel Florentin, Vice President iti Business Affairs Benguet State University, beripikarenda ti nasao a report agsipudta saan paylaeng a naisimpa ti Memorandum of Agreement.
Malaksid iti dayta, manarimaan ti pannakaadal pay daytoy.
Impasigurado ni Floretin, nga agaramid dagitoy iti kaskenan nga addang seknan kadagiti stall owner iti strawberry farm apaman a mapaneknekan nga awanan dagitoy iti business permit.
Maipalagip nga immunan nga immapela dagiti sumagmamano nga stall owners idiay Benguet State University Strawberry Farm gapu iti panag-operate dagiti kapadada nga stall owners sadiay iti laksid nga awanan dagitoy iti permit ken Memorandum of Agreement iti nasao a pagadalan.
Sigun iti maysa nga stall owner, nasurok uppat a bulanen nga aglaklako dagiti awanan iti permit ken MOA nga stall owners.
Imbinglayna nga idi laeng Disyembre ket saan unay a dakkel ti naglakuan dagiti addaan iti permit nga stall owners gaputa adu ti kakompitensiada nga awanan kadagiti nadakamat a kaskenan a dokumento.
Nupay adda metten dagiti sumagmamano nga stalls a naiparekep gapu iti panag-operateda iti nabayagen a panawen nga awanan iti permit ken Memorandum of Agreement, adda latta dagiti mangilaklako kadagiti nagduduma a produkto sadiay BSU Strawberry Farm.
Gapu iti dayta, agkidkiddaw dagiti aglaklako nga addaan iti permit para iti tignay ti kameng dagiti maseknan nga opisina ken otoridad.//Bombo Genzel Depayso
