BAGUIO CITY – Posible a mangrugin inton bigat, aldaw ti Miyerkoles ti panagbiahe dagiti parapasahero a bus ken vans iti sumagmamano a ruta iti Luzon.
Iti interview ti Bombo Radyo Baguio, inwaragawag ni City Administrator Engr. Bonifacio Dela Peña nga inaprobaranen ni Mayor Benjamin Magalong dagiti protocol ken proseso iti operasyon dagiti nasao a parapubliko a lugan.
Kinunana a karaman kadagiti masurot a pagalagadan ket iti laeng expressway a dumalan dagiti parapasahero a bus, addaan dagiti bus iti bukod a comfort room tapnu saandan nga ag-stop over ken addaanda ti ventilation system, dagiti ruta ket point-to-point laeng ken sakbay nga aglugan dagiti pasahero ket nasken nga addaanda ti negative result ti antigen wenno RT-PCR test.
Dinakamatna a karaman kadagiti naaprobaran a ruta dagiti parapasahero a bus ket ti Baguio-NCR; Baguio-Bontoc, Mountain Province; Baguio-Clark, Pampanga; Baguio-San Fernando, Pampanga; Baguio-Mabalacat, Pampanga; Baguio-Mariveles, Bataan ken Baguio-Olongapo City.
Naaprobaran met ti panagbiahe dagiti utility express vans nga addaan ruta ti Baguio-Cabanatuan, Nueva Ecija; Baguio-San Carlos, Pangasinan; ken Baguio-Lingayen, Pangasinan.
Inlawlawag pay ni Engr. Dela Peña a maituloy ti panagbiahe dagiti nasao a ruta kalpasan ti inspeksion ita nga aldaw ken iti panakaipaay ti Certificate to Operate manipud iti LTFRB.
Dinakamat met ni Engr. Januario Borillo, dadaulo ti Traffic, Transport Management Division ti City Engineering Office ti Baguio a malimitaran ti bilang dagiti bus nga agbiahe iti walo a bus iti innaldaw manipud iti amin a ruta.
Inlawlawagna a babaen iti daytoy ket maprebentaran ti panagadu ti tattao iti central triage a pakaiturongan amin dagiti pasahero sakbay ti panagsisinada iti drop off terminal ditoy siudad.
Innayonna a naipaayan iti schedule ti panagbiahe dagiti amin a parapasahero a bus ken vans a nasken a nainget a suruten dagitoy.
