BAGUIO CITY – Maituloy ita nga aldaw ti search and rescue operations iti agasawa a nagaburan iti nargaay a daga iti Antamok River sadiay Beda, Loacan, Itogon, Benguet.
Linawlawagan ti kabagian dagitoy a magmagna ti agasawa a da Nestor Talangcag Sr. ken Morina Lintan iti igid ti karayan idi nagaburan dagitoy iti nargaay a daga manipud iti ngatoen ti bantay.
Pinukawanda pay ti agasawa idi nakitada a margaayen ti paset ti bantay ngem saan dagitoy a nangngeg ti agasawa gapu iti uni ti danum iti karayan.
Immuna metten a naipadamag a nakalasat ti dua nga annak ti agasawa manipud iti insidente kalpasan a nakataray dagitoy.
Iti agdama, agar-aramaten dagiti rescuers iti backhoe tapnu naparpartak ti operasyon.
Nangitulod metten ti DSWD-CAR iti maysa a tent ken family food packs para kadagiti rescuers.
