Saan a mairekrekomendar ita a gundaway ti panag-camping iti Mount Pulag gapu iti manamnama a paniempo ti La Niña.
Iti panakiuman ti Bombo Radyo kenni Emerita Albas, ti Mt. Pulag Park Superintendent, kinunana nga ita a panawen ti panagtutudo ket bimmasit dagiti trekkers nga agbisbisita iti nasao a lugar.
Kabayatanna, dumandanon met iti 8 agingga 10 degrees celcius ti kalam-ekan a temperatura iti nasao a lugar.
Sigun kenni Albas, natarimaanen dagiti trailway a nadadael nangruna ti Akiki Trail.
Malaksid iti dayta, imbinglay ti Mt. Pulag Superintendent nga awanen dagiti tour guides a mangiliblibas kadagiti turista nga agturong iti nasao a pagpasyaran.
Nupay kasta, kinuna ni Albas nga adda ti agur-uray a pannusa nga aglabsing iti pagannurotan dagitoy maipapan iti panangilibas kadagiti turista.
Maipaayan ti warning ti umuna a panaglabsing; suspension wenno panakaikkat ti slot nga agbalin a tour guide iti maikadua a panaglabsing; ken termination ti permit dagitoy para iti maikatallo a panaglabsing.
Kabayatanna, manannama nga inton sumaruno a tawen ket maipasdek ti kanayonan a comfort room ken view deck iti Camp 2 ti Mt. Pulag.//Bombo Mera Pacpacan
