BAGUIO CITY – Imbilin ni Kalinga Governor Jocel Baac ti panagdalus dagiti empleyado ti provincial capitol sadiay iti Kalinga Provincial Hospital.
Intunda daytoy ti rimsua a parikot gapu iti nagwaras a damag maipapan iti kinarugit, kinabangsit ken kinakurang ti seguridad iti nasao a pagagasan.
Sigun iti gobernador, nasken nga agsisinnublat dagiti empleyado dagiti opisina ti kapitolyo nga agdalus iti pagagasan pakairamanan ti provincial engineering office, general services office, office of the provincial governor ken dadduma pay.
Imbilinna met laeng ti pannakai-deploy ti kanayonan a security personel a mangsukat iti gwardiya ti nasao a pagagasan.
Kinuna pay ni Baac nga inspeksionenda ti Kalinga Provincial Hospital tapno maaksionan dagiti nasao a parikot.
