Manarimaan paylaeng ti panagdalus dagiti otoridad kadagiti nauram a babalay idiay MRR Queen of Peace barangay.
Iti pannakiuman ti Bombo Radyo kenni Honorable Raul Caronongan ti kapitan ti nasao a barangay, kinuna a nangrugi ti clearing operation dagitoy idi lunes, Abril a kinse kalpasan nga inaprobaran ti Bureau Of Fire Protection-Baguio ti pannakadalus iti daytoy.
Pinagyamanan ni Caronongan ni Mayor Benjamin Magalong gapu iti dagus a panag-aksyon daytoy kas ti panangipaayna iti financial assistance kadagiti biktima ken ti panangibaonna kadagiti otoridad a timmulong iti clearing operation.
Dagiti timmulong ket pakairamanan ti Public Order and Safety Division- Baguio, Baguio City Police Office ken dadduma pay nga ahensia iti syudad ti Baguio.
Kinunana a nangipaay met ti Department of Social Welfare and Development (DSWD) iti tulong pinansyal a P20,000 kadagiti biktima iti nasao nga uram.
Nupay kasta, imbinglayna a nagbalin a karit kadakuada dagiti kinakurang dagiti items a naidonar wenno saan nga agpapada agsipud ta adda dagiti dadduma nga agselos no saanda a maikkan iti agpada a banag wenno makan.
Kabayatanna, adda metten dagiti dadduma a biktima iti opisina ti senior citizen iti nasao a barangay; dagiti estudyante nga agab-abang ket nakabiruk dan ti nagalisanda a boarding; dagiti dadduma a pamilya ket agab-abang da metlaeng idiay MRR Queen of Peace , bayat a dagiti dadduma ket nagturongda iti sabali a barangay.
Innayon ti nasao a kapitan nga adda ti contact numbers-da kadagiti sangagasut sangapulo ket uppat a biktima isu’t gapuna a dagus met nga ipakaammoda kadakuada apaman nga adda dagiti donations.
Iti agdama, manarimaan paylaeng ti imbestigayson ti rason ti nasao nga uram.
Maipalagip a napasamak ti uram idi agsapa ti sabado, abril a trese, iti agdama a tawen no sadino sangagasut sangapulo ket uppat nga indibidual ti naapektaran iti daytoy.//Bombo Rosemarie Bulsao
