BAGUIO CITY – Nagresulta iti nakaro a trapiko ti panagdidinnungpar ti lima a dadakkel a lugan sadiay Marcos Highway, partikular iti sangwanan ti maysa a construction company sadiay Upper Poblacion, Tuba, Benguet idi parbangon kalman.
Sigun kenni PCI James Acod, hepe ti Tuba PNP, nairaman iti aksidente ti maysa a ten-wheeler truck, dua a ten-wheeler wing vans, maysa a trailer tanker kien maysa a van.
Kinunana a paturong iti siudad ti Baguio City ti ten-wheeler truck nga imanmaneho ni Agusto Tolentino manipud Lapaz, Tarlac idi impilit ti driver a sumang-at iti nakadlis a kalsada.
Gapu iti daytoy, naikadlis ti pilid ti nasao a trak ken killaat daytoy nga immatras agingga a nadungpar ti dua a ten-wheeler wing vans a mangsarsaruno iti daytoy.
Nadungpar met ti maysa kadagiti wing vans ti sumarsaruno pay a trailer tanker ken ti nakaparada a van.
Dagus met a naiturong iti pagagasan ti walo a pasahero ti nakaparada a van para iti medical attention nupay awan ti nadangran kadagitoy bayat a nagsagrap iti dadael dagiti nairaman a lugan.
Gapu iti daytoy, iyap-apela manen ti pulisya ti panagannad dagiti motorist iti panagbiaheda iti Marcos Highway nangruna ta nakadlis ti kalsada ken nadagsen unay ti karga dagiti dadadkkel a trak wenno van a dumaldalan sadiay.
