BAGUIO CITY – Mangnamnama ti Philippine Red Cross (PRC) – Baguio Chapter nga adu a volunteers ti makipaset kadagiti maisayangkat a serye ti Dugong Bombo 2020 ditoy siudad ti Baguio ken kadagiti dadduma pay a blood donation drive iti lokalidad.
Iti interview ti Bombo Radyo Baguio, kinuna ni Jennelyn Terre, medical technologist ti PRC-Baguio a babaen iti daytoy ket maaddaan ti siudad iti umdas a suplay ti dara para kadagiti agkasapulan ita a holiday season, nangruna iti panawen ti emerhensia.
Dinakamatna a manipud nangrugi ti agdama a pandemya ket nagtalinaed nga adu latta dagiti agkasapulan ti dara nupay bimmassit dagiti agdondonar iti daytoy ken nagtalinaed a bassit ti suplayda iti dara.
Innayonna a kadawyan a bassit ti suplay ti dara tunggal Disyembre ken Enero gapu iti kabassit dagiti agdondonar ngem mangnamnamada nga ita a pandemya ket umado dagiti agdonar ita a bulan.
Sigun pay kenkuana, mabalinda a sukunen ken itulod iti pagtaenganna dagiti kayatda ti agdonar ti dara iti PRC-Baguio.
Impanamnamana metlaeng nga adda dagiti safety measures a sursuruten dagitoy tapnu maipanamnama a natalged manipud iti COVID-19 dagiti agdonar, personnel ti PRC nga agasikaso iti agdonar ken ti proseso ti panagdonar iti dara.
Naituding a maisayangkat ti Dugong Bombo 2020: A Little Pain, A Life To Gain iti barangay hall ti Irisan inton bigat bayat nga iti Malcolm Square inton Dominggo, December 20.
