BAGUIO CITY – Makikokoordinaren ti Public Order and Safety Division (POSD) ti siudad ti Baguio iti maysa a pribado nga organisasyon para iti panangsuplayda iti body cameras nga aramaten dagiti enforcers daytoy.
Sigun kenni POSD Deputy Head Daryl Kim Longid, mapasayaat ti komunikasyon ken ti transparency ti operasyonda babaen iti panagaramatda ti body cameras.
Kinunana a mabalinda nga aramaten dagiti mairekord ti body camera kas ebidensya iti kanito nga adda ti agreklamo kadakuada seknan iti panagabuso dagiti enforcers ken makitada ti panaglabsing dagiti enforcers ken dagiti complainants.
Mamati metlaeng daytoy a mapunas iti panunot ti publiko dagiti maatap a panagabuso nga ar-aramiden dagiti enforcers ti POSD babaen kadagiti mairekord ti body cameras.
Nupay kasta, kinunana a marigatanda kadagiti supplier ti body cameras gaputa adu ken nagduduma ti maikalkalikagum sakbay a makaalada ti suplay ti body cameras.
Innayonna a 50% laeng kadagiti POSD personnel ti maipaayan iti nasao a kagawaan gaputa nangina ti tunggal unit ti camera nga aggatad iti P7,000.
Imbinglay ni Longid a dumanon iti P350,000 agingga P400,000 ti pondoda para iti panakagatang dagiti nasao a kagawaan.
Kabayatanna, kinunana nga adda ti isaysayangkatda ita nga internal mechanism a mangrisot kadagiti misconduct a mapaspasamak kadagiti enforcers ti POSD.
