Nangipila ni Senate Minority Floor Leader Aquilino “Koko” Pimentel III ti singasing a resolusion a mangimbestigar kadagiti insidente ti pannakarba dagiti rangtay iti nagduduma a paset ti Pilipinas.
Insingasing ni Senador Pimentel ti Senate Resolution No. 1319 kasaruno ti kaudian a pannakarba ti maysa a paset ti rangtay ti newly-built Cabagan-Sta. Maria Bridge idiay Isabela kalpasan a limmabas ti dump truck iti rabawna.
Ti napasamak nga insidente ket rason ti pannakdangran ti innem nga indibidual.
Ti dadduma pay nga insidente a dinakamat ti senador ket ti Magapi Bridge idiay Balete, Batangas; Bantilan Bridge iti nagbaetan ti Batangas ken Quezon Province; Carlos Romulo Bridge idiay Bayambang, Pangasinan; Borja Bridge ken Loay-Clarin Bridge idiay Bohol, ken dadduma pay a rangtay.
Sigun kenni Pimentel, binilbilion ti nabusbos a kuarta ti Pilipinas ngem narba laeng dagitoy iti apagdarikmat.
Insingasing ni Pimentel a rumbeng nga adda ti maitutop a Senate committee a mangisayangkat ti panagimbestigar tapno sungbatan ti siasinoman a rasponsable nga public official, kontraker ken dadduma a partido a karaman iti pannakarba ti rangtay.
Itay laeng nabiit, nangiyuswaten ti Department of Public Works and Highways iti imbestigasion iti rangtay idiay Isabela nga aggatad ti P1,225,537,087.92.
Nangrugi a naibangon ti rangtay idi Nobiembre 2014 ken nalpas laeng idi Pebrero a uno idi napalabas a tawen.
