Sinuspender ni Public Works Secretary Vince Dizon ti panagisuot ti uniporme dagiti kameng ti Department of Public Works and Highways.
Mainaig daytoy iti agtultuloy nga imbestigasyon kadagiti maatap nga anomalous flood control projects.
Maibasar iti memorandum, imbilin ni Dizon nga amin nga opisial ken empleado ti DPWH ket saan a mangisuot iti uniporme ti opisina agingga iti kanayonan a pakaammo.
Pangep daytoy a masalakniban dagiti empleado ti DPWH manipud iti bullying ken harassment mainaig iti agtultuloy nga imbestigasion ti iregularidad kadagiti flood control projects.
Iti baet dayta, maiyunay-unay kadagiti opisial ken empleado ti nasao nga ahensia nga ituloy-da ti ag-report.
Agisuot-da iti presentable a kawes, maitunos kadagiti pagalagadan ti propesionalismo iti serbisio publiko.
