Mangrugin inton bigat ti panagkakampanya dagiti National candidates wenno dagiti senador ken dagiti nagduduma a partylist.
Iti panakiuman ti Bombo Radyo kenni Atty. Reyman Solbita, Election officer sadiay Bangued, Abra, kinunana nga iti panagrugi ti campaign period ket maipayanen dagitoy iti otoridad a mangimanehar kadagiti campaign materials.
Gapu iti dayta, al-allukoyenna dagiti supporters dagiti national candidates a tungpalenda dagiti pagannurutan maipapan iti panangipaklat kadagiti posters kas iti panangikargada kadagiti umno a common poster area, ti panagsurot iti umno a size a 2 by 3 feet ket ti panakaimprinta dagiti kaskenan nga impormasyon kas iti nagan ti donor ken ti address dagitoy.
Sigun kenni Atty. Solbita, ado met dagiti campaign materials dagiti national candidates a nakapaklat sadiay Bangued, Abra ngem saanda pay a magaraw dagitoy.
Gapu iti dayta, nasken nga ikkaten dagiti supporters dagiti kandidato dagiti iligal a posters tapno saanda a maipaayan iti notice of removal.
Kinuna ni Atty. Solbita a tallo nga aldaw ti naipay kadagiti kandidato a mangikkat kadagiti campaign materialsda ngem no saanda a maikkat daytoy ket mismo a ti Oplan Baklas committee ti mangikat ken mang-inventory kadagitoy a maaramat iti panangipila iti kaso.
Naituding a no mapaneknekan a ti maysa a kandidato ket “liable,” mabalin a madiskwalipikar daytoy iti posisyon a pagtartarayanna bayat a posible pay a makulong dagitoy iti las-od ti maysa agingga innem a tawen.