BAGUIO CITY — Pormalen ng indeklara ni Presidential Adviser on Political Affairs Secretary Francis Tolentino ti panagleppas ti rescue operations iti Level 070, Firstgate sadiay Ucab, Itogon, Benguet.
Sigun kenkuana, search and retrieval operation laengen ti maisaysayangkat ita iti Ground Zero tapnu mabirukan dagiti mapukpukaw.
Kinunana a kasapulan nga aklonen ken sangwen ti kinapudno a giddanan ti community ken family counselling.
Imbilinna met ti panangidaulo ti Department of Social Welfare and Development – Cordillera iti panaka-impormar dagiti kabagian dagiti mapukpukaw nga agbalin laengen a retrieval operation ti maaramid iti Ground Zero.
Maisayangkat met ti counseling session ken stress debriefing para iti dumanon 30 a pamilya iti training center ti ahensiya sadiay Baguio City.
Inkarina pay ti agtultuloy a retrieval operation kadagiti nabatbati a missing tapnu maipaayan dagiti biktima iti umiso a tabon.
Inwaragawag ni Tolentino ti deklarasyon kalpasan nga irekomendar daytoy ni Office of Civil Defense – Cordillera Regional Director Rueben Carandang kalpasan nga awan ti nakitada a sinyales ti biag iti paset ti portal a mapapati a nagkamangan dagiti minero manipud iti nagaburan a bunkhouse.
Agtaltalinaed met iti Ground Zero ti 11-man team ti Philex Mining Corporation para iti maisaysayangkat a retrieval operation.
