BAGUIO CITY – Ibalbalakad ti maysa a konsehal ti Baguio City ti panakaorganisa wenno panagtitimpuyog dagiti amin a vendors ti Burnham Park tapno agkakadwada a mangidanon ti pakaseknanda iti lokal a gobierno ti siudad.
Iti panakiyuman ti Bombo Radyo kenni Councilor Philian Weygan Allan, Committee Chair on Market, Trade and Commerce, and Agriculture; dinakamatna a naobserbarana a saan pay a nasayod ti organisasion dagiti vendors.
Kinunana a no adda ti napatibker a grupo wenno panagkakadwa dagiti vendors ket makabukelda iti proposal nga isumitirda iti lokal a konseho nangruna iti nabayagen a kidkiddawenda a panakaibangon ti kiosks a paglakuan dagitoy iti nasao a parke.
Immuna iti daytoy, kukuwestionaran dagiti dumanon 90 a displaced vendors ti saanda a panakaiprioridad iti 16 a kiosks nga umuna a maipasdek iti nagbaetan ti Childrens Park ken Ibaloi Park kas maibasar iti inaprubran ti lokal a konseho.
Inlawlawag met ni Councilor Weygan a maipaay kadagiti orihinal a vendors dagiti kiosks kas resulta ti assessment ti City Environment and Management Office (CEPMO).
Iti baet dagitoy a pakaseknan, inaklon ti opisial a narigat ita ti sitwasion ti negosio sadiay Burnham Park gaputta dakkel a karit ti panakaibalanse ti maipapan kadagiti vendors ken iti proyekto ti lokal a gobierno.
Nupay kasta, iyap-apelana ti ad-adda a panangawat dagiti vendors agingga a kabaelanda a makauray tapno maipaay kadakuada ti matagtagiuray a pwesto a paglakuan dagitoy.
