BAGUIO CITY – Agtaltalinaed a karit ken parikut kadagiti healthcare workers iti probinsia ti Benguet dagiti pasyente a nagpositibo iti COVID-19 nga agkedked no maiturong iti isolation facility.
Sigun kenni Dr. Jocelyn Legaspi, Provincial Rural Health Physician ti Benguet Provincial Health Office, adda ti maysa a pasyente nga impanda iti isolation facility ngem nagkedked a sumrek iti silid a nailatang iti daytoy ken nagawid iti pagtaengan dagitoy ngem nagsubli metlaeng iti kabigatanna.
Impettengna a ti inaramid ti nasao a pasyente ket maysa a panaglabsing iti paglintegan kontra iti COVID-19.
Dinakamatna a nagbalin metlaeng a parikutda iti nasao nga insidente ti panakiballaet dagiti ‘persons in authority’ kabayatan ti panakaiproseso ti panaka-admit ti nasao a pasyente iti isolation facility.
Gapu iti daytoy, inyapela ni Dr. Legaspi ti panagtulnog dagiti COVID patients iti probinsia iti health protocols, pakairamanan ti panag-uray dagitoy iti balakad dagiti contact tracers mainaig iti panakaiturong dagitoy kadagiti isolation facility.
Immuna metten nga inaklon ni Itogon Mayor Victorio Palangdan nga adda dagiti COVID patients sadiay a maki-apa kadagiti frontliners gaputa saanda a kayat a maiturong kadagiti isolation facilities.
Inyunay-unayna a ti maysa a rason no apay a ngumatngato ti kaso ti COVID-19 sadiay Itogon ket gapu kadagiti umili a saan nga agtungtungpal kadagiti paglintegan iti panag-quarantine.
Kabayatanna, impasigurado met ni PLt.Col. Baldwin Sokoken Jr. manipud iti Benguet Police a mabalin nga agserbi dagiti pulis kas escort dagiti pasyente ti COVID-19 nga agkedked a ma-admit wenno maiturong kadagiti isolation facilities.
