BAGUIO CITY – Maob-obserbaran ita ti hesitation wenno panagkedked dagiti umili iti lokalidad nga agpa-booster shot.
Sigun kenni Baguio City Health Services Office Nurse V Sonia Insas, bassit dagiti indibidual nga agturturong kadagiti bakuna centers tapno agala ti booster vaccine.
Kinunana a pampanunuten paylaeng dagiti kaaduan no kayatda nga agpa-booster shot wenno umdasen ti dua a dose ti COVID vaccine a naawatda.
Sigun kenkuana, no idilig iti bilang dagiti naipaayan ti dua a dose ti COVID vaccine iti uneg ti tallo a bulan ket ad-adda a nabbababa ti bilang dagiti nakaalan ti booster shot.
Maibasar iti datus, agarup iti 29,900 nga indibdiual ditoy siudad ti nagpa-booster shot.
Impettengna pay a napateg ti booster vaccine tapno ad-adda a maprotektaran kontra iti COVID-19.
Impanamnamana met nga umdas pay dagiti bakuna a maipaay kadagiti residente a kayatda nga agpa-booster shots ken mabalin pay dagitoy nga nga agpili ti kayatda a brand ti bakuna para iti booster vaccine.
