BAGUIO CITY- Imbestigaran ti opisina ti mayor ti La Trinidad, Benguet ti charge-counter-charge case iti nagbaetan da Councilor Nestor Fongwan Jr. ken La Trinidad Municipal Zoning Officer Engr. Emerson Tabernero.
Sigun kenni Mayor Romeo Salda, iggemnan ti kopya ti kaso nga unjust vexation nga impila ni Tabernero kontra kenni Fongwan iti La Trinidad PNP bayat a naamuanna laeng ti nagtutuon a kaso nga impila met ni Fongwan kontra kenni Tabernero sadiay Civil Service Commission gapu iti maatap a korapsion.
Kinunana a silulukat met ti Mayor’s Office kadagiti dadduma pay a posible a nagbalin a biktima ti maibagbaga a korapsion iti opisina ti mairekreklamo nga inhenyero.
Sigun kenkuana, babaen iti daytoy ket adda ti maurnong nga ebidensia tapnu mapaneknekan no pudno wenno saan ti alegasyon.
Impetteng pay ti mayor a ti numero uno a mandato dagiti ahensia ti gobyerno ket ti saan dagitoy a panakairaman iti aniaman a kita ti korapsion.
Maipalagip a gapu iti panangdanog iti lamisaan, panangbugkaw ken panangibabain ni Fongwan kenni Tabernero iti napalabas a sesyon ti Sangguniang Bayan ket impilana ti kaso nga unjust vexation kontra iti konsehal.
Impila met ni Fongwan ti administrative case kontra kenni Tabernero gapu iti maatap a korapsion nga ar-aramiden ti dadaulo ti Municipal Zoning Office.
