BAGUIO CITY – Mangrugin ita nga aldaw, March 11 ti panagkolektar ti lokal a gobierno ti Baguio iti regulatory fees kadagiti agaramat kadagiti napili a kalkalsada iti sentro ti siudad a mabalin a pagparadaan.
Maibasar iti Ordinance No. 68, series of 2020, adda dagiti napili a paset ti kalkalsada iti sentro ti Baguio a mabalin a pagparadaan para kadagiti 4-wheeled motor vehicles a saan nga aglagpas iti 5.5 meters ti kaatiddogna ken kadagiti motorsiklo.
Mangrugi ti panagparada iti alas-siete ti agsapa agingga alas-siete ti rabii kadagiti kalsada kas iti Lower Session Road, Leonard Wood Road Junction agingga Casa Vallejo, T.M Kalaw Road Junction agingga PFVR ti Upper Session Road, sangwanan ti Court of Appeals ken cottages ti Supreme Court, kanigid a lane ti corner Session Road agingga corner General Luna iti Assumption Road, Harrison Road, Calderon Street, Claudio Street ken iti Kayang Hilltop Road.
Dumanon iti P50 para iti umuna a duwa nga oras ti mabayadan para kadagiti lugan ken kanayunan a P20 no mailaylayon pay ti oras daytoy bayat a P20 para kadagiti motorsiklo ken kanayunan a P10 para iti kanayunan pay nga oras.
Malimitaran iti agingga tallo laeng nga oras ken 15 a minutos a pawayway ti panagparada ti maysa a lugan wenno motorsiklo sadiay.
Mamulta ken mabaklasan ti plaka wenno maipasidong iti towing dagiti saan a sumurot iti limitasyon ti oras iti panagparada.
Nadutukan ti City Engineering Office ken ti Traffic and Transport Management Division a mangkolektar kadagiti regulatory fees.
