BAGUIO CITY – Inkalintegan ti maysa a transport group iti lokalidad ti maipadpadamag iti social media a panakalabsing ti 70% capacity kadagiti pasapasahero a jeep.
Iti interview ti Bombo Radyo Baguio, impetteng ni Patricio Evangelista, regional president ti Liga ng Transportasyon at Operator ng Pilipinas – CAR and Region 1 a kadawyan a mapaspasamak ti nasao a panaglabsing kabayatan ti RUSH HOUR ken kadagiti ruta a bassit laeng nga yunit ti napalubusan nga agbiahe.
Kinunana nga iti grupoda ket naibilin kadagiti lider dagiti miembroda a transport group ti panangipaganetget dagitoy kadagiti miembroda iti panakasurot ti 70% capacity.
Impeksana met ti panagyamanda gaputa uray adda ti Baguio iti sidong ti Alert Level 3 ket napalubusan latta ti 70% kas maximum capacity kadagiti parapasahero a jeep.
Innayonna a naobserbaranda metlaeng a dagiti panaglabsing iti 70% capacity dagiti jeep ket ar-aramiden dagiti drivers a saan a miembro dagiti asosasyon dagiti jeep.
Sigun pay kenni Evangelista, nakasagana ti liga dagitoy nga agtungpal no adda man ti pammilin para iti panakaimplementar ti ‘no vaccination, no ride’ a polisiya kadagiti parapasahero a jeep ditoy siudad.
Inyunay-unayna metlaeng a maawatanda ti sitwasyon ken ti polisiya ket saan laeng a para iti pagimbagan dagiti pasahero ngem ketdi, nangruna iti pagimbagan dagiti drivers ken operators ken dagiti pamilya dagitoy.
Kabayatanna, dinakamat ni Evangelista nga agtungpalda no adda man ti pammilin a maipaulog para iti panakaisubli manen ti plastic barriers kadagiti parapasahero a jeep.
Nupay kasta, kiniddawna met ti panakaipaay ti ayuda kadagiti drivers nangruna ti plastic a maimuntar iti uneg ti jeep ken ti panggatangda iti disifectant para iti regular a disinfection iti lugan dagitoy.
