BAGUIO CITY – Binallaagan ti Punong Barangay ti Quezon Hill Proper ti maysa a negosyante iti masakupanna gapu iti panaglabsing daytoy iti Anti-Road Obstruction Order ti lokal a gobyerno ti Baguio.
Iti panakiyuman ti Bombo Radyo kenni Caesar Malicdan, kapitan ti Quezon Hill Proper, Baguio City, kinunana nga awan ti written agreement iti nagbaetanda iti maysa nga establisyemento sadiay a kanayon nga iligal nga agparparada iti kalsada sadiay Second Road.
Kinunana a nakitaripnong daytoy iti agtagikua iti pasdek tapnu ikaten daytoy dagiti lugan iti kalsada ngem saan latta a nagtignay ti nasao a negosyante.
Dinakamat ti kapitan a nangipila ti nesgosyante iti kaso nga excessive use of power kontra kenkuana ngem mamati ti kapitan a saan nga umno ti nadakamat a kaso gaputa ti nesgoyante ti aglablabsing.
Innayonna nga indiayana ti bukodna daga a pagparadaan ti nasao a negosyante tapnu laeng maikkat dagiti lugan daytoy nga iligal a nakaparada iti kalsada.
Guyguyuguyen pay ni Malicdan dagiti otoridad nga iyemplimentarda ti linteg iti nasao a pakaseknan partikular iti establisyemento a kanayon nga aglabsing iti ARO Order. (-with Bombo Nikki Agsiweng)
