SYDNEY AUSTRALIA-Napasaran dagiti umili sadiay Sydney ti panaglayos gapu iti napigsa a tudo.
Gapu iti dayta, idagdagadag dagiti otoridad ti Australia nga agturong wenno umakar dagiti umili ti New South Wales idiay Sydney iti nangatngato a paset ti lugar.
Sigun kadagiti otoridad ti New South Wales ita nga agsapa, naibilin kadakuada ti sangapulo ket dua nga emergency evacuation pakairamanan ti sumagmamano nga agtataeng idiay Sydney, pagtaengan ti nasurok 5 milyon nga indibidual, kakaruan ken kapeggadan a naapektaran ti panaglayos.
Maibasar iti datos a nailista ti State Emergency Service, uppat a pulo ket uppat nga indibdiual ti naisalakan manipod iti panaglayos bayat nga uppat a ribo sangagasut dua pulo ket walo a tawag ti tulong ti naawatda iti napalabas a dua pulo ket uppat nga oras.
Iti agdama, agtultuloy latta ti panag-rescue dagiti otoridad sadiay.
Maipalagip a nagtudo ti nakaro nangruna iti abagatan a daya ti Australia idi laeng Biernes.
Gapu iti dayta, dagos a nagpakdaar dagiti otoridad iti publiko a liklikanda ti panagbiahe, la kitdi agtalinaedda kadagiti uneg ti babbalay dagitoy.
Iti datos ti weather forecaster, 111 mm wenno 4.4 inches a panagtudo ti napasaran sadiay iti las-od ti baente kuatro nga oras idi kalman ti agsapa.
