BAGUIO CITY- Puntirya ita ti Benguet Schools Division a mailukat amin dagiti parapubliko nga elementarya ken sekondarya a pagadalan iti Benguet sakbay nga agleppas ti shool year 2021-2022.
Sigun kenni Gloria Buya-ao, dadaulo ti SDO-Benguet, 397 manipud iti 486 a pakabuklan a bilang dagiti pagadalan iti probinsia ti mangipatpatungpalen ti face-to-face classes.
Dinakamatna a dumanon met iti 56,000 nga estudyante ti makipaspaset iti nasao a wagas ti panagadal.
Imbinsana nga adda pailaeng dagiti matartarimaan a pagadalan ken adda pailaeng dagiti saan a nabakunaan a mannursuro rason a saan a napalubosan dagitoy a mangipatungpal iti in-person-classes.
Sigun kenni Buya-ao, dua laeng a pagadalan sadiay La Trinidad pakairaman ti Longlong ken Wangal ti mangipatpatungpal iti blended learning gapu kadagiti nadakamat a rason.
Iti baet daytoy, mangnamnama ti opisial a manayonan pay ti bilang dagiti pagadalan a makipaset iti face to face classes babaen iti assessment nga ipatungpal dagitoy kadagiti sumarsaruno nga aldaw.
