Impaganetget ni Senador Panfilo Lacson a saan a trabaho ti Senate impeachment court a luktan ti selyado a kahon ti Bureau of Internal Revenue (BIR).
Sigun kenkuana, rumbeng nga agkiddaw ti House prosecution panel iti pammalubos manipud iti Office of the President no kayatda a luktan ti BIR box.
Kabayatanna, impakaammo ni Sen. Lacson a napagnunumuanda iti caucus dagitoy idi Biernes nga isublida ti BIR box iti House prosecution gaputa awan ti karbengan ti korte nga ilummeng wenno agserbi a “gatekeeper” dagiti ebsidensiya a saan paylaeng a pormal a naiparang iti trial.
Inyunay-unay ni Sen. Lacson nga iti sidong ti Sectoion 71 ti Tax Code, dagiti tax record ket confidential ken mabalin laeng a mairuar wenno luktan no adda ti nakasurat a pammalubos manipud iti Presidente.
Nagballaag ti Senador nga iti kanito nga ipilit ti Senate impeachment court a luktan ti kahon nga awanan iti ligal a pammalubos, agpeggad ti Senado ken maidarum iti “grave abuse of discretion.”
Ti selyado a kahon ket naglaon iti tax record ni VP Sara Duterte ken ti asawana a ni Mans Carpio nga insubmitir ti BIR iti House Justice Committee.
Impasa ti Kamara iti Senado a saan a nalukluktan no sadino, panggep ti House prosecution panel a maluktan tapno maaramat kas ebidensiya para iti Article II ti Articles of Impeachment nga adda ti pakainaigan ti maatap nga “unexplained wealth” ti VP Sara Duterte.
Nupay kasta saana paboran ti kampo ti bise presidente a maluktan daytoy.
