Kidkiddawen ita ni La Trinidad Mayor Roderick Awingan kenni Benguet Governor Melchor Diclas ti panaglukat ti paset ti Stockfarm wenno Benguet Sports Complex idiay Barangay Wangal kas temporaryo nga staging area dagiti nateng.
Sigun kenni Mayor Awingan, ti nasao a kiddaw ket gapu iti petisyon dagiti mannalon ken traders idiay Backfill Trading Area idiay Km. 5 no sadino kidkiddawenda ti kanayonan nga staging area nangnagruna ita a panawen ti panagtutudo.
Innayon ti mayor a gapu iti limitado nga espasyo, kidkiddawen dagiti grupo ti mannalon ken negosiante ti panaglukat ti maysa pay nga espasyo Benguet Sports Complex para kadagiti agpilpila a delivery trucks nga agturong iti nagduduma a trading facilities pakairamanan idiay La Trinidad Vegetable Trading Post, Backfill Area ken Benguet Agri-Pinoy Trading Center (BAPTC).
Patien ti mayor a makatulong daytoy tapno ma decongest ti traffic iti central business district area ti nasao a munisipyo. //Bombo Khey
