Impalagip ni Jun Estallo, director ti Philippine Advocates for Road Safety, a saan a rumbeng a lumabes iti sangapulo nga oras ti panagmaneho iti tunggal aldaw.
Sigun kenni Estallo, ti agtultuloy a panagmaneho ti dua agingga uppat nga oras ket kasapulan ti panaginana iti kinse agingga trenta a minutos.
Malaksid iti nasayaat a pisikal a kasasaad, masapul met nga addaan ti drayber iti nalawa a pannakaawat, attidog nga anus ken umno nga estratehia iti panagmaneho iti kalsada.
Idi bulan ti Mayo a Road Safety Month, nairekord ti sumagmamano a nakalkaldaang a trahedia iti panagmaneho.
Karaman ditoy ti multiple vehicle collision iti Subic-Clark-Tarlac Expressway wenno SCTEX idi Mayo a uno nu sadinno, maibagbaga a nakaturog ti drayber ti bus bayat nga agmanmaneho, kasta metten iti napasamak iti Ninoy Aquino International Airport (NAIA) Terminal 1 idi Mayo 4 a nakatayan ti dua nga indibidual, karaman ti maysa nga 4-anyos nga ubing.
