BAGUIO CITY–Maiparit latta ti panagminas sadiay Itogon, Benguet nangruna ita a panawen ti panagtutudo ken panagbabagyo.
Inyunay-unay daytoy ni Police Major Rommel Sawatang, dadaulo ti Itogon Municipal Police Station iti panakiyuman ti Bombo Radyo.
Inaklona a maob-obserbaran latta kadagiti umili ti Itogon ti panagturongda kadagiti pagminasan iti laksid ti peggad nga itunda ti saan a a nasayaat a sasaaden ti panawen.
Malaksid iti daytoy, dinakamat ti opisyal nga ado latta kadagiti residente iti masakupanda a lugar ti saan nga agtultulnog kadagiti otoridad nangruna dagiti agnanaed iti bulnerable a lugar.
Nupay kasta, ikagkagumaan latta ti pulisya ti mangipalagip kadagiti residente nga agbakwit iti naidesignar nga evacuation centers iti kanito nga agpaabiso dagiti otoridad.
Inalukoyna ti publiko a makikoordinar iti lokal a gobierno ken dagiti maseknan nga ahensia maipapan iti pakaseknan dagitoy ita a panawen ti panagtutudo.
