BAGUIO CITY – Posible a ngumato ti kaso ti COVID-19 ditoy syudad ti Baguio kabayatan ti summer season wenno kalgaw.
Inwaragawag daytoy ni City Health Officer Dr. Rowena Galpo kagiddan ti panangilawlawagna a sakbay a mapasamak ti nasao nga insidente ket posible a mapasaran nga umuna ti panagbaba ti bilang dagiti kaso ti nasao a sakit.
Kinunana a ti downtrend ket resulta ti nababa a kaso iti napalabas a dua a lawas gapu iti ababa a bilang dagiti nagpositibo iti naisayangkat a kaudian a mass testing ti siudad.
Inlawlawagna nga ita a kalgaw ket posible metlang a ngumato ti bilang dagiti kaso ti COVID-19 iti siudad gaputa kas ‘summer capital’ ti pagilian ket manamnama ti panagsangbay ti adu a turista a mangitunda iti nangato a mobility wenno panaggaraw ti tattao.
