BAGUIO CITY – Imballaag ti dadaulo ti City Health Services Office (CHSO) a rugrugina paylaeng ti panagngato ti kaso ti dengue a mailislista ita ditoy Baguio.
Iti panakiuman ti Bombo Radyo Baguio, kinuna ni City Health Officer Dr. Rowena Galpo a posible nga umado pay dagiti kaso ti dengue iti siudad isut gapuna a nasken nga irtengan pay ti kampanya kontra iti dengue.
Kinunana nga iti datus dagitoy ket nailista ti 863 a kaso ti dengue fever iti siudad manipud iti Enero agingga Agosto 21 ti agdama a tawen nga addaan ti pito nga ipupusay.
Sigun kenkuana, innem a daras a nangatngato ti nasao a kaso no idilig iti 123 a kaso ti dengue fever a nailista ti siudad idi Enero agingga Agosto ti napalabas a tawen.
Innayonna a nainget met a bambantayanda dagiti 29 a barangay ti siudad a nakailistaan ti panaggugrupo ti dengue cases.
Dinakamat pay ni Dr. Galpo nga iti rekord ti CHSO ket nailista idi 2016 ti kangatuan a kaso ti dengue iti siudad, partikular iti bulan ti Agosto a dimmanon iti nasurok 2,400.
Gapu iti daytoy, kinunana a makitkitan ti cycle occurrence ti dengue a tunggal uppat wenno lima a tawen ket ngumatngato ti kaso ti dengue.
