Pagdandanagan ti Tabuk City Epidemiology Surveilance Unit ti panagngato ti kaso ti dengue sadiay gapu ta nagtriple daytoy iti sigud a datos da a 879 manipud Enero agingga Setyembre iti agdama.
Nangatngato daytoy no idilig iti datos a 318 idi napalabas a tawen iti kapada metlaeng a period.
Sigun kenni City Epidemiology Surveilance Unit Assistant Coordinator Celeste Mia Diasen, dagus a ngimmato ti kaso ti dengue iti tallo a lawas iti agdama a bulan no sadino nakairekord dagitoy iti 148 a kaso ti nasao a sakit.
Karaman iti top five barangays ti Malin-awa, Amlao, Agbannawag ken Nambucayan.
Gapu iti daytoy, inyunay-unay ti nasao nga opisyal iti publiko nga agdalus dagitoy kadagiti paaraangan, pagtaengan ken dadduma pay tapno mapaksyat dagiti pagitlogan dagiti lamok.
Impalagipna metlaeng ti panangsurot iti 5S strategy kontra iti dengue kas iti search and destroy mosquito breeding sites; use self-protection measures, seek early consultation, stay hydrated ken say yes to fogging no kasapulan.
Malaksid iti dayta, impalagipna pay ti panagaramat iti insect repellent, agaramat iti long sleeves ken pajama ken dadduma pay.
